Ich weiss, es passt absolut nöd da ine, aber jetzt hani grad en riese Schockmoment gha, woni festgstellt ha, das min GG am Ziischtig Geburtstag hed. Irgendwie isch mier das immer so wiit entfernt vorcho und jetzt bini total überforderet.

Er hed sich en Rasierer oder en Uhr gwünscht. Beides isch uf minere Ikaufslischte gstande. Inzwüsche hed de gueti Maa sich beides selber kauft Und jetzt stahni plötzli mit leere Händ da.

Also iher Liebe, ich weiss grad nöd, a wen ich mich sött wende drum, wenn iher mer Ideeä und Tipps hend sind iher mier (eimal meh) gold wärt!

Liebe Gruess

ou nei janedoe, du armi

isch natürlich schwierig zum dich berate wenn mir din gg nöd kenned.. mir schenked eus viel "Erlebnis" Sache, also öppis womer chönd zäme mached. wassi scho gschenkt han isch en nachtschlittleusflug mit Fondue, schlittehunderenne, e hotelübernachtig inere Stadt idä CH oder in Münche oder so öppis. viellicht wär das öppis? gahn suscht mal uf geschenkparadies.ch, viellicht findsch dete na e Inspiration? und suscht chömed bi mim gg elektro-Sache immer guet a, also spieli fürd PS oder so :)

hoff findsch bald öppis passends !!

usflug ufs Jungfraujoch

Danke viiiillmal für eui Tipps.

Das mit de Weekends und Usflüg hebi mier für Wiehnachte uf... bzw. es isch so, das mier eus kei Wiehnachtsgschenk möched, defür unter em Jahr mind. zwei Weekends öpis speziells mached.

Ich ha ihm jetzt es neus, grosses Chüssi kauft. Sit mier zemewohned, han ich immer es riese Chüssi und er nur sones 65 x 65... aber natürlich chlaut er mier immer miis. Denn hani gfunde, das seg no en schöni Idee. Ich gah de hüt no go Stoff poste und tue ihm en Azug nähe, vo Hand, da ich kei Nähmaschine ha... also es isch denn meh en symbolische Azug als en bruuchbare

Aso min GG hed de en schissfreud gha am Chüssi. Bi de bi daydeal no über s neue Fifa gstolperet und ha das gad au no in Aktion kauft. Chli was für s Männerherz hani denkt. Aber ihn heds gar ned interessiert, nume das Chüssi :D De Azug isch echt meh schlecht als recht glunge, aber er gseht de Gedanke dehinter Voll härzig.

Danke nomal für eui liebe Tipps und s mitdenke