23.09.08 13:30
madmadi  

|
Re: Budget Hochzeitsessen
Carolina, denn händ ehr pro Person ca. Fr. 50.-- zur Verfüegig? Dänke, wenn der s Ässe eifach lönd lo liefere (möglechscht ned z wit här), aber kei Personal händ, wo serviert (d.h. ehr chöned au d Getränk sälber bsorge ohni Zapfegäld müesse z zahle), müessti das möglech si - wie du seisch z.B. Tischgrill oder Fleisch-Fondue, wo sech jede sälber ab de Platte bedient, denn länge äuä Fr. 50.-- scho. Sobald aber Personal amene Buffet stoht, wo Ässe usegit und Getränk nocheschänkt oder Servierpersonal bruchsch, wird's schnäll emol tüürer.
Restaurant oder Partyruum bzw. privati Rüümlechkeite - das isch halt Istelligssach (und hangt sicher au mit Erfahrige zäme, wo mer scho gmacht het).
Mer hend för Fr. 690.-- en Partyruum (Chalet Pilatus Neuenkirch) für zwöi Täg (1 i aller Rueh irichte und vorbereite, 1 Fescht) gmietet, d Reinigung het Fr. 120.-- (Vermieter) koschtet und de Partyservice för 60 Lüt inkl. alles Fr. 5'100.-- (Metzgerhalle Fahrwangen). Mir händ für Ässe und Trinke also ned emou 100.-- pro Person zahlt und es händ alli gschwärmt vom feine Ässe und em gmüetleche Rahme, wo mer i somene Partyruum het. För öis het das perfekt gstomme.
De Grund, wieso mer ned ines Resti händ welle, esch gsi, dass mer dete max. bis am zwöi cha blibe und mer händ welle, dass mer mit öisne Gäscht so lang chöne fiiire, bis mer z müed sind (mer sind am vieri deheim gsi). Bem Hochzit vonere Cousine hämmer das als eigenartig empfunde, wo mer am zwölfi eifach so "heigschickt" worde sind. Zudäm hämmer ebe dete so chlini, edli Portione öbercho, dass mi Ma no fasch Hunger gha het, wo s Ässe fertig gsi esch... das hämmer be öisem Hochzit um jede Priis welle verhindere (chunnt aber sicher ou uf's Resti drufa).
Wer ufenes Restaurant ned wetti verzichte, aber d Fiir ned wett abbräche, wel s Resti zuetuet, isch mer jetzt im Nachhinein mol no dore Chopf, dass mer als Brutpaar inere Bar, wo mer aschliessend cha härego, wemmer nonig hei mag, chönnti di erschti Rondi zahle. So chöne die wo wänd hei ond di andere hätte dete d Möglichkeit witer z feschte.
Grüessli madmadi
Sit em 8. August 2008 glücklichi Ehefrau!
|