Ich bin mir bereits am ersti Gedanke mache über d'Blueme an dä Hochziet. Dä Bruutstruss und dä Nebetstruss wird ich sicher kaufe. Aber für d'Blueme in dä Kirche und uf dä Tisch im Restaurant bin ich no am überlege. Händ ihr alles kauft oder selber gmacht?
Nimmt mich mal Wunder... Fotis vo dä Blueme sind natürlich herzlich willkomme!
Mer hei alles kauft und eg muess säge, dass es nidemau sooo tür isch gsi! Also die ganzi Arbet mit der Materialbeschaffig zum das ganze sälber z mache hani mer gärn erspaart!!! Grad d Blueme ir Chile hei villecht 500.- koschtet und im Reschti hets grad emau 200.- koschtet und das ischs mer würkli wärt gsi.
Hallo Manuela Also i ha vor kurzem d Bluemedeko fürnes Hochzit gmacht u muess säge, dass es scho rächt vil Ufwand isch. Wenn i s nomau würd mache, würd i z.B. nume d Kirche sälber dekoriere und am Aabe öpper anders la mache. S chunnt natürlech o druf a, wie vil Deko dir weit: 1 Altargesteck und 10 Bankstrüssli git nid soo vil z tüe. Möchtsch am Aabe Gsteck uf de Tische (eher viel Ufwand) oder einzelni iigstellti Blueme (weniger Ufwand)? Kerze? Tischwösch? Es isch immer d Frag, was no alles zur Bluemedeko drzueghört, mir hei z.B. no sälber müesse tischdecke... Was i definitiv nid würd mache, isch als Brut mini eigeti Hochzit dekoriere. I fröie mi scho so ufe Überraschigseffekt :-) . Und usserdäm hesch 1. kaum Zit und 2. möchtsch ja äuä schöni Händ a dim Hochzit, für das isch e Fritig lang Blueme vorbereite o nid so förderlich. Hoffe, das bringt di chli witter bim Entscheide Lg, Meitli
Ich ha a mim eignä Hochziit die ganz Bluemedeko sälber gmacht. Das heisst ich ha Herzli schweisse lo (siehe Bild) für d Chile und d Blume drah gmacht. Würd i übrigens vermietä. Dänn de Altar gschmückt. Dänn ha ich drü Autogsteck gmacht und dänn am Obig uf de Tisch Rosechuglä. Sind glaub 10 Stuck gsi. Ich ha chöne min enere Kollegin a dBörsä go d Blueme iichaufe. Ha au nuchli gluegt uf Aktione. De Brutstruss & de Näbetstruss mit de Ahstecker für d Manne hät mini Kollegin gmacht. Allem i allem ha ich öpe für d Deko CHF 1'000.- usgeh ohni d Arbet grächnet.
Ha vor paar Wuche au d Deko vo minere Schwö gmacht. Ha bi ihre i de Chilä au die Herzli gha mit Sunneblueme drah. Hät uh schön gwürkt. Am Obig ha ich dänn so rundi gflochtni Chörb kauft wo ich Chazägras dripflanzt ha, dinn häts dänn au wieder Sunneblueme gha. I de Mitti isch uf jedem runde Tisch dänn nu en Kelch mit enere Cherzä gstande. Hät mega usgseh. D Deko hät ca. 600-800.- koschtet ohni Arbet.
Ich has toll gfunde d Deko sälber zmache, dänn sust wärs nid so cho wie ichs mer vorgstellt heti. Ich mach das nume hobbyhalber und bin überhaupt nid usbildäti Florischtin. Ha sicher de ganz Friitig drah gha aber mir isch es wärt gsi. Ha mega viel Komplimänt übercho.
Grüessli suse
I bi sit em 1. Septämber 2007 glücklich verhürotät...
@ Mara: Das isch ja würklich günstig gsi. Bi mir würts wohl eher umgekehrt sie, d'Blueme im Resti sind mer wichtiger als die in dä Kirche.
@ meitli: Chan ich mir vorstelle, dass das viel Arbeit gsi isch. Also Kerze und Tischwösch werdet vom Restaurant glieferet und die tischet denn au selber. Ich wet scho lieber Gsteck und nöd einzelni Blueme. Das mit dä Händ ha ich gar nöd überleit. Ich wird ebe d'Wuche zwüschet Zivilem und Kirche frei ha, drum ha ich denkt, dass seg sicher easy zum mache. Aber muens mir wohl nomal überlege.
@ Suse: Wow Du häsch ja würklich mega Talent im Umgang mit Blueme! Mir händ im Fall genau dä glich Gschmack. Din Bruutstruss gseht genau so us, wie ich en mir vorgstellt ha und au am Abig chönt ich mir Rosechuglä vorstelle. Wieviel vo dene gschweiste Herzli häsch denn Du mache lah?
buah suse DAS sieht ja toll aus, bist ja ein naturtalent! die idee mit dem katzengras kann ich auch für etwas anderes sicher mal abkupfern . die geschweissten herzen sind so schön. meine kirchendeko steht jedoch schon, ansonsten hätte ich dich sofort angefragt. wo hast du die den schweissen lassen. bei einem kollegen oder in einer werkstatt?
zivilisch verhiratät sit em 06.06.08, kirchlich am 06.09.08
Ha so änlichi Herze mal gseh andere Hochziit und ha dänn gsuecht und gsuecht, aber eifach nienäts gfunde oder sust mega tür.
Ha dänn die Herzä sälber zeichnät und will ich mal d Lehr als Mechanikerin gmacht ha ha ich do chli beziehigä zu Lieferantä wo ich dänn ahgfrögt ha zum laserä und schweissä. Min ehemalige Lehrmeischter hät mer dänn au nu ghulfä damit sie so perfekt worde sind wie ichs mer vorgstellt ha. D Herzli groschtät ha ich sälber im Garte Aber es isch e rächt türi Sach gsi und drum würd is au gern mal witer vermietä. Has scho mal usglehnt, gäll "Icewoman"
Ich ha vo dene Herzli 8 grossi, das heisst sie ragät über de Bank us. Heti au nu Stei dezue wo mer d Herzli vor de Chilä chönti anestelle. Dänn ha ich ca. 14 chlineri Herzli wo mer grad cha an Bank anemache cha. Und nu es paar wo mer bim Altar oder Rednärpult cha bruche. Also sicher gnueg...
Ich chönt mal nu meh Föteli schicke, muesch mer eifach dini Mailadrässe ahgeh. Dänn cha ich dir einigi verschideni Föteli schicke.
Manuela du bisch do i de nöchi vo Walenstadt dihei oder??!!??
Anmelden
Fotis vo dä Blueme sind natürlich herzlich willkomme!
DAS sieht ja toll aus, bist ja ein naturtalent! die idee mit dem katzengras kann ich auch für etwas anderes sicher mal abkupfern 
. die geschweissten herzen sind so schön. meine kirchendeko steht jedoch schon, ansonsten hätte ich dich sofort angefragt. wo hast du die den schweissen lassen. bei einem kollegen oder in einer werkstatt?
